Uppskot til løgtingslóg um broyting í løgtingslóg um dagstovnar og dagrøkt - býti millum land og kommunu, tilboð og aldursbólkar, námsfrøðilig og sernámsfrøðilig ráðgeving - Til hoyringar
Uppskot til løgtingslóg um broyting í løgtingslóg um dagstovnar og dagrøkt verður við hesum sent til almenna hoyring við hoyringarfreist 5. januar 2026.
Endamálið er at dagføra lógina frá ár 2000, so hon hóskar betur til dagsins tørv, faklig krøv og samfelagsligar broytingar. Uppskotið greinar ábyrgdarbýtið millum land og kommunur, ger greiðari, hvørji tilboð og aldursbólkar lógin fevnir um, og setur felags karmar fyri námsfrøðiliga og sernámsfrøðiliga ráðgeving.
Høvuðsbroytingar:
• Greitt ábyrgdarbýti: Verandi ábyrgdarbýti verður nágreinað, so tað týðiliga framgongur, hvør hevur fakliga og fyrisitingarliga ábyrgd.
• Samstarvsnevnd: Ein nevnd við umboðum frá land og kommunum skal samskipa menning á økinum.
• Greið avmarking av tilboðum: Lógin fevnir um dagrøkt, vøggustovu, barnagarð og frítíðarstovnar til og við í minsta lagi 2. flokk.
• Reglur um upplatingartíðir: Reglurnar verða gjørdar greiðari; kommunan kann hava stongt upp til fimm vikur um árið.
• Ráðgeving: Kommunur skulu veita námsfrøðiliga ráðgeving; landið veitir sernámsfrøðiliga ráðgeving, tá serligur fakligur tørvur er.
Uppskotið skal tryggja øllum børnum javnbjóðis og dygdargóð tilboð, óheft av bústaði.
Møgulig hoyringarsvar verða at senda til bumr@bumr.fo
Dagføra Dagstovnalógina 28.11.25 (1) 