Landsstýrismaðurin í barna- og útbúgvingarmálum, Djóni Nolsøe Joensen, hevur borið fram broytingarkunngerð, sum er lýst í vikuni.
Uppskotið er ein broyting í upptøkutreytunum, sum nú ger tað møguligt hjá heilsurøktarum at søkja inn til bachelor í sjúkrarøktarfrøði, og hjá námsfrøðihjálparum at søkja inn á diplomútbúgvingina í námsfrøði, sum væntandi verður boðin út í 2026. Tey, sum velja at taka diplomútbúgvingina í námsfrøði kunnu tá eisini søkja inn á bachelorútbúgvingina sum námsfrøðingur, har diplomparturin fult og heilt verður góðskrivaður inn á bachelorútbúgvingina.
Broyttu upptøkutreytirnar eru bæði galdandi fyri heilsurøktarar og námsfrøðihjálparar á Heilsuskúla Føroya og frá líknandi útbúgvingarstovnum í Danmark.
Landsstýrismaðurin gleðist um, at yvirgongdin frá Heilsuskúla Føroya til Fróðskaparsetur Føroya nú er møgulig, og at okkara útbúgvingar í Føroyum gerast meira samanhangandi.
Kunngerðin kann lesast her.